शहापूर : शहापूर तालुक्यातील बाबरे येथील आदिवासी कातकरी मुला-मुलींसाठी अनुदानित आश्रमशाळा आणि चांग्याचापाडा येथील रयत शिक्षण संस्थेचे नूतन माध्यमिक विद्यालय येथे आसरा फाउंडेशन द्वारे ‘तिमिरातुनी तेजाकडे’ या मोफत शासकीय स्पर्धा परीक्षा मार्गदर्शन शिबिराचे यशस्वीरीत्या आयोजन करण्यात आले.
या शिबिरात सीमाशुल्क विभागाचे कनिष्ठ अनुवाद अधिकारी सत्यवान यशवंत रेडकर यांनी विद्यार्थ्यांना मोलाचे मार्गदर्शन केले. स्पर्धा परीक्षांची तयारी कशी करावी, त्यासाठी आवश्यक असलेले विषय आणि अभ्यास पद्धती यावर त्यांनी सखोल माहिती दिली. यावेळी विद्यार्थी, त्यांचे पालक आणि शिक्षकवर्ग मोठ्या संख्येने उपस्थित होते, त्यांनी रेडकर यांच्या मार्गदर्शनाचा लाभ घेतला.
आसरा फाउंडेशनचे अध्यक्ष मोहन शिरकर यांनी याप्रसंगी बोलताना सांगितले की, आदिवासी भागातील मुला-मुलींना स्पर्धा परीक्षांच्या माध्यमातून उज्ज्वल भविष्य घडवता यावे यासाठी आसरा फाउंडेशन यापुढेही अशाच प्रकारची मार्गदर्शन शिबिरे राबवत राहील. या उपक्रमामुळे आदिवासी विद्यार्थ्यांना शिक्षणाच्या मुख्य प्रवाहात आणण्यास आणि त्यांना सक्षम बनवण्यास मदत होईल, असा विश्वास त्यांनी व्यक्त केला.
यावेळी नूतन माध्यमिक विद्यालयचे मुख्याध्यापक हरणे एम एच सर, शिक्षक प्रवीण भेरे सर, आदिवासी कातकरी अनुदानित आश्रमशाळेचे मुख्याध्यापिका आशा रणखांबे मॅडम, अधिक्षक अंजली बांगर, शीतल सूर्यवंशी, भिमराव राऊत, संदिप पडवळ, आसरा मुक्तांगनच्या प्रतिनिधी शबाना पटेल, तसेच इतर शिक्षक व शिक्षकेतर कर्मचारी यांनी उपस्थिती दर्शवली. शिबिराच्या आयोजना करिता आसरा फाउंडेशनच्या प्रतिनिधी कीर्ती परब यांचे विशेष सहकार्य लाभले.